超抵死呀！

大少一放假最開心嘅就係我喇...

点解？？如果唔出街的話....佢就會掙住嚟煮嘢過我哋嘆㗎喇！

你話爽唔爽呢？？

大少雜錦炒麵...嘩, 多料到呢！

正...正....正！

哈....我又玩嘢喇！！！

有次喺日本麵包鋪見倒個包包裏面放咗啲炒麵嚟做餡呀！

嘩, 我冇睇錯呀吓....有点九唔搭八嘅感覺,

仲要成 US$3.99 一個添！

奇就奇怪在見倒好多日本人買嚟食呀,

仲衰到食到津津有味咁款.....睇到我 O 晒嘴呢！

但我始終接受唔倒囉....所以冇試到。

直到今日大少整呢個炒麵....

哈....哈....哈....呢次仲唔比機会我試吓咩！

屋企冇麵包....但係有薄餅噃,

照.殺.......我就梗係要加辣至得喇！

嘩！唔講得笑呀...........正到飛起呀！

就地取材....我都服咗自己呀！

係咪超抵死呢....？？？

不過好味咪得囉...

那管是用麵包定薄餅吖！

冒牌 Brownies

係咪好以 brownies 呢？

嘻嘻....朱古力蛋糕嚟架！

話說收倒個超正嘅 brownies 模,

点知屋企冇朱古力存貨...

又想即刻試...唔理三七廾一喇！

整朱古力蛋糕都要試試佢先喇喂,

結果焗完出嚟個個都以為係 brownies 嚟架！

你話似唔似呢？

焗完可升高佢...

個架一抽起就自動分開十八件架喇,

十分方便...

每件四边都香㗎！

靚過我自己切喇！

今次麵糊倒滿咗少少.........

所以高咗少少出嚟....無咁靚仔囉！

其实早前喺 TV 見倒都好想買㗎...

但遲遲未有行動...跟住連廣告都冇埋,

咁就巳經不了了知.....

吓.....点知少爺仔上星期去 shopping 嘅時候, (佢同大少行,我就同大小姐)

比佢發現咗....佢仲即刻走去話比大少知,

話呢個係媽咪好鐘意架...叫大少一定要買,

就係咁....我就多咗件新玩具喇喂！

少爺仔真係好有我心呀...不枉我咁錫佢,

呢個冒牌 brownies 就係咁就誕生咗呢！

三文魚头煲

好耐冇整三文魚頭煲喇！

喺韓国超市買咗三個大三文魚頭,

超新鮮呀...咁就梗係即時食咗先算喇！

首先炸香啲支竹先...

忍唔住一路炸就一路偷食，

輕輕煎吓啲三文魚頭先再加料炆...

雖然話就話係魚頭...但都好多肉架！

加埋炆完啲支竹入味到呢....餸飯真係無得頂呀！

又一餐滿足之作呢！

Surprise！

今朝晨咁早郵差就叮噹....咩料咁早呀！

一開門...原嚟係香港寄嚟嘅郵包...係一大箱呀,

真係超超超 Surprise 呀！

一睇...原來係少爺仔喺香港嘅契媽寄比佢嘅生日禮物是也，

少爺仔仲有成兩個星期先至到佢牛一,

咁快就收到禮物....放学番嚟实開心 C 佢啫,

知佢莫若契媽喇.....係少爺仔嘅至愛 "GUNDAM" 高達呀！

仲有專程喺杭州訂製嘅蠶絲被啊.......So Sweet.....So Warm！

呢個契媽真係唔話得呀！多謝晒！

少爺仔番到嚟我就即刻叫佢打电話去香港多謝契媽先,

嘩, 識做得佢吖......

"I love you 契媽...多謝啲禮物呀....你幾時過嚟呀...

I miss you so much....Love you....love 到佢暈晒呀！"

加埋個 Kiss ....有乜法子唔錫到佢濃吖！

是日晚餐終於都整咗個魚批喇！

真該 C 呀...成日以為雪櫃仲有洋䓤,

点知萬事俱備嘅時候就...！？！？！？

哈....有菠菜响樹噃....hehehehe...

毛豆話落乜都得架嘛....

白汁魚喇...菠菜喇.......自家製薯蓉喇.....芝士喇，

落足料架.....四層冇走雞！

其实個做法都幾似我之前整過嘅 Shepherds pie 架！

個面焗得唔均勻嘅.....唔靚仔添,

層次分明....

魚夠滑溜...菠菜夠嫩....薯蓉夠香滑....芝士夠香,

個個讚不絕口...真你 Encore 都嚟唔切呀！

 

今晚少爺仔就最開心喇,

有正嘢食...又有禮物收...

何為滿足......睇吓少爺仔個樣就知㗎喇！

師奶本色

近年好鐘意去逛韓国超市,

好多韓日嘅貨品都十分齊全...仲唔啱晒我咩！

韓式年糕一片片就見得多喇,

但一條條咁好抵 C 呀！

忍唔住又買嚟試吓.....

哈...又唔錯噃.....好煙靱好有咬口....I like it！

哈, 仲比我發現咗呢隻新嘅日本 Wasabi 沙律醬添呀,

我又点會執輸至得㗎....一買就三支 US$3.99 一支。

仲買咗韓蒜蓉麵豉醬...試過喇！幾唔錯架！

呢個咪就係買嚟醃 Kimchi 嘅韓國辣醬囉...勁正呀！

仲有買咗急凍鮑魚...US$19.99/lb 減到US$9.99/lb,

半價呀...又買咗兩磅有多呀！

虎蝦又减 US$3.99/lb....又買....仲有三文魚頭呀！

將師奶本色發揮得淋漓盡至呀！

嘩, 真係買餸都買得開心過人,

乜乜物物載滿一車先肯回家去也。

無料椰汁糯米糍

早前姨甥 call 嚟話想食糯米糍....梗係無問題喇！

仲要指明唔要任何餡添....咁就話都冇咁易喇,

整咗兩款....椰絲同芝痲！

 

呢啲細細粒...你估用嚟做咩呢？

原來佢係用嚟撈雪糕一齊食架！

我真係大鄉里呀.....

話咁快就大功告成...包好晒就送咗比姨甥,

希望佢滿意...食得又開心呢！

自家製Kimchi (附食譜)

一向鐘情於辣嘅我....尤其喜嗜勁辣 Kimchi,

有時去食韓國菜好大原因都係為咗佢,

今次的起心肝自己嚟....試吓整,

吓！成功喇....有得食喇喂！

实在太興奮喇.....

食譜來源：Shirley Yick

材料:  娃娃菜  3棵 (500g)

      鹽  2湯匙

醃料: 薑  2片

      蒜頭  8粒

      乾蔥  4粒

      韓國辣椒醬  250g

      魚露  2湯匙

      糖漿/粟米糖漿 (Golden syrup/Corn syrup)  1湯匙

烹調步驟:

(1) 娃娃菜洗淨, 用刀將每棵切成4份, 用凍滾水浸15分鐘, 瀝乾水份,

 

(2) 娃娃菜放在大盆或大鍋內, 灑上鹽, 帶著手套拌勻, 醃1晚,

(3) 醃１晚後, 娃娃菜會變得軟身, 折不斷, 這時便可放在筲箕內1小時至瀝乾水份,

買咗隻比較靚啲嘅牌子...比其它貴差不多一倍呀！

(4) 等娃娃菜出水時, 可準備醃料:

將薑, 蒜頭和乾蔥剁成蓉 (可用攪拌機代勞),

然後加入韓國辣椒醬, 魚露和粟米糖漿拌勻,

試味 (可用韓國辣椒醬, 魚露和粟米糖漿分別加

辣, 加鹹或甜味, 調整自己喜愛的味道便可,

(5) 帶上手套, 將娃娃菜放在大盆或大鍋內, 加入醃料拌勻,

直至每片菜葉都均勻地沾上醃料,

(6) 放入密實盒或玻璃瓶內, 置雪櫃內醃1星期便可。

小貼士：

(1) 韓國泡菜是生吃的, 所以衛生特別重要, 要避免沾到生水, 故Shirley洗好娃娃菜之後, 會用凍滾水浸15分鐘才開始醃。.

(2) 為了醃得均勻, 一定要用手攪拌, 所以切記戴手套, 戴手套也可避免雙手被辣椒刺激, 也可避免沾上氣味。

(3) 每次取出Kimchi食用時, 要注意用具一定要乾, 不可讓未吃的Kimchi沾到生水, 否則會變壞。