以毒攻毒

咳咗大大話話成個星期,
越咳越利害....好似生人勿近咁,
噚晚感恩節仲失埋聲添...
啲火雞粥實在太正...噚晚巳經清晒,
今日為有再煲過皮蛋瘦肉粥喇....
不過百無禁忌嘅我乜都照食...無有怕呀！
見倒啲 XO 醬嘛...？？

用XO 醬嚟餸粥餸糭...簡直係一流呀！
叫我點忍呀...我一路食, 大少就喺旁边一路做白天鵝,

一於以毒攻毒.....
哈.....食完不單咳少咗,
仲開番少少聲添呀！
真係信不信由你呀！

感恩

感恩節前夕同大家姐呀..表哥呀...屋企人咁去咗呢度慶吓先！
啲嘢食唔錯架...水準都保持得幾好,
唔知係咪我哋好大食呢？
叫到個部長都話好喇...唔好再叫喇..你哋實食唔晒架！
攪到我哋都唔好意思再叫添.......

顧住密密咁食.....有幾碟同甜品都忘記拍照添！

感恩節又點少得火雞呢....
正日我就喺屋企焗咗隻火雞喇！
今年用老外的方法...醃咗成三日架！
好入味....皮脆肉滑 juicy 到不得了呀,
大家都讚口不絕呀！

用焗火雞啲汁嚟整 gravy 簡直就係原汁原味呀！

薯仔放在火雞烤盤內一齊焗...入晒味好正呀！

焗火雞嘅目的都係為咗煲火雞粥咋....
起肉後用啲火雞骨嚟煲粥就簡直係一流呀....
原汁原味....煲足幾粒钟...超正呀！

實在感恩在這佳節能與家人一起共聚.....
感恩節快樂！

自然

有咩嘢係開心得過可以瞓到自然醒呢.....
噚日小朋友学校開始放假,
我哋竟然瞓到成十點幾先起身,
實咗太美妙喇！
左攪右攪一輪之後....
都十一點幾喇....食咩好呢？
小爺仔話要蛋蛋腸腸....
大小姐又話要火腿蛋....
仲有乜乜加物物......
結果變咗碟大拼盆咁....
不過真係勁豐富勁好味呢！

同場加映少爺仔上星期五交咗嘅 family project.

Turkey 是也.....

係咪好靚呢？

自然就是美嘛！

潤一潤先....

晨早空氣清新開朗....陽光温曖帶來無限美
噚朝早喺後園被氛香樸鼻的白花檸檬所吸引,
隱唔住摘咗幾個嚟冲檸蜜,
天氣乾燥....真係要潤一潤至得喇！
樹上熟...睇吓幾新鮮！

原來啲柑都食得喇....

呢個係大家姐种嘅石榴...好巨形呀！

母

啲柑好甜好多汁呀！

後園的每一草一木都是大少的心血,
而我只是那位坐享其成的人呢！

天寒地凍煲煲煲

天氣一轉涼....就会心思思想食煲仔飯,
但用瓦煲火力難控制,
比我煲裂咗嘅瓦煲大大話話不下十個,
真係有啲怕怕呀！
話過唔会再買瓦煲架喇....
所以今次試用呢個煲煲睇吓得唔得先？

阿蘇教落啲臘腸要直插落去啲米嚟煮先至入味架！
一半咸魚....一半碎牛肉,
咁咪唔駛掙囉！

隨咗有XO醬豉油之外.......(係我同大少嘅)
硬係要整番碟唔辣嘅醬油比小朋友架喇！
唉.....點解醬油裏面有盞水晶燈嘅？

煮煲仔飯最緊要係個底,
事實証明....用呢個煲出嚟嘅飯,
絕對有用瓦煲所煲出嚟嘅效果呀！
正呀....咁我以後就唔会再煲裂瓦煲喇！